மீண்டும் கைகோர்த்த சி.வி.எஸ் – எஸ்.பி.வி? அதிமுகவில் புதிய அதிர்ச்சி – உடையும் சிக்னலா?
அதிமுகவில் நிலவும் அரசியல் பரபரப்புக்கு இடையே, முன்னாள் அமைச்சர்களான சி.வி.சண்முகம் மற்றும் எஸ்.பி.வேலுமணி மீண்டும் சந்தித்து ஆலோசனை நடத்தியதாக வெளியாகியுள்ள தகவல் கட்சிக்குள் புதிய அதிர்வலைகளை ஏற்படுத்தியுள்ளது. இந்த சந்திப்பு, முன்னாள் அமைச்சர் சி.விஜயபாஸ்கர் தனது எம்எல்ஏ பதவியை ராஜினாமா செய்துள்ள சூழலில் நடந்துள்ளது குறிப்பிடத்தக்கது.
சென்னையின் எம்.ஆர்.சி நகரில் உள்ள சி.வி.சண்முகத்தின் அலுவலகத்தில் இந்த ஆலோசனை நடைபெற்றதாக கூறப்படுகிறது. இதில் அதிமுக அதிருப்தி அணியைச் சேர்ந்த சில எம்எல்ஏக்களும் கலந்து கொண்டதாக தகவல்கள் தெரிவிக்கின்றன.
விஜயபாஸ்கரின் ராஜினாமா, கட்சிக்குள் ஏற்கனவே இருந்த அதிருப்தியை மேலும் அதிகரித்துள்ளது. அவர் தமிழக வெற்றிக் கழகத்தில் இணையலாம் என்ற தகவலும் அரசியல் வட்டாரங்களில் பரவி வருகிறது. இதனால், அதிமுகவில் இருந்து மேலும் சிலர் மாற்றம் நோக்கி நகரலாம் என்ற ஊகங்கள் வலுப்பெற்றுள்ளன.
சி.வி.சண்முகம் தற்போது உடனடியாக தனது பதவியை ராஜினாமா செய்து இடைத்தேர்தலை சந்திக்கத் தயாராக இல்லை என கூறப்படுகிறது. அதேவேளை, எடப்பாடி பழனிசாமியுடன் ஏற்பட்ட கருத்து வேறுபாடு காரணமாக தனது அரசியல் நிலைப்பாட்டை மறுபரிசீலனை செய்து வருவதாகவும் தகவல்கள் வெளியாகின்றன.
மறுபுறம், எடப்பாடி தரப்பு சி.வி.சண்முகத்திற்கு எதிராக கடுமையான நடவடிக்கை எடுக்காமல், அவரை கட்டுப்பாட்டில் வைத்திருக்க முயற்சி செய்கிறது என கூறப்படுகிறது. இதனால் அதிருப்தி அணியினருக்கு மாற்று வாய்ப்புகள் குறையலாம் என அரசியல் பார்வையாளர்கள் கருதுகின்றனர்.
இந்த சூழலில், சி.வி.சண்முகம் – எஸ்.பி.வேலுமணி சந்திப்பு முக்கிய அரசியல் சிக்னலாக பார்க்கப்படுகிறது. அதிருப்தி எம்எல்ஏக்களின் அடுத்தகட்ட முடிவுகள், இடைத்தேர்தல் மற்றும் கட்சி மாற்றம் குறித்து ஆலோசிக்கப்பட்டிருக்கலாம் என கூறப்படுகிறது.
ஏற்கனவே பல தொகுதிகள் காலியாக உள்ள நிலையில், இந்த புதிய கூட்டணி முயற்சி அதிமுகவில் மேலும் பிளவு ஏற்படுத்துமா என்ற கேள்வி அரசியல் வட்டாரங்களில் எழுந்துள்ளது.
