ராமேஸ்வரத்தில் முதலமைச்சர் கோப்பைக்கான துடுப்புப் படகுப் போட்டி: ஒலிம்பிக் நீர் விளையாட்டுகளைத் தமிழகத்தில் வளர்க்க ஆட்சியர் வலியுறுத்தல்

ஒலிம்பிக் போட்டிகளில் இடம்பெறும் கயாக்கிங், கேனோயிங் உள்ளிட்ட நீர் விளையாட்டுகளைத் தமிழகத்தில் மேலும் வளர்த்து, இளம் வீரர், வீராங்கனைகளுக்கு மாநில, தேசிய, சர்வதேச அளவிலான போட்டிகளில் பங்கேற்கும் வாய்ப்புகளை உருவாக்க வேண்டும் என ராமநாதபுரம் மாவட்ட ஆட்சியர் சிவகுரு பிரபாகரன் வலியுறுத்தினார். ராமநாதபுரம் மாவட்டம், நாகாச்சி கிராமத்தில் தமிழ்நாடு விளையாட்டு மேம்பாட்டு ஆணையம் சார்பில் நடைபெற்ற முதலமைச்சர் கோப்பைக்கான மாநில அளவிலான துடுப்புப் படகுப் போட்டிகளைத் தொடங்கி வைத்துப் பேசியபோது அவர் இவ்வாறு கூறினார்.அக்டோபர் 17-ஆம் தேதி நடைபெற்ற இப்போட்டிகளில் சென்னை, செங்கல்பட்டு, ஈரோடு, தஞ்சாவூர், திருச்சி, மதுரை, ராமநாதபுரம், திருப்பூர் உள்ளிட்ட மாவட்டங்களைச் சேர்ந்த வீரர், வீராங்கனைகள் பங்கேற்று தங்களது திறமைகளை வெளிப்படுத்தினர்.இப்போட்டிகளில் வெற்றி பெற்ற வீரர்களுக்கு ரொக்கப் பரிசுகள் வழங்கப்பட்டன. முதல் பரிசாக ஒரு லட்சம் ரூபாயும், இரண்டாம் பரிசாக 75 ஆயிரம் ரூபாயும், மூன்றாம் பரிசாக 50 ஆயிரம் ரூபாயும் வழங்கப்பட்டன.இந்நிகழ்ச்சியில் மண்டபம் ஊராட்சி ஒன்றிய ஆணையர் கோட்டை இளங்கோவன், வட்டார வளர்ச்சி அலுவலர் நடராஜன், மாவட்ட விளையாட்டு அலுவலர் தினேஷ்குமார், தமிழ்நாடு கயாக்கிங் மற்றும் கேனோயிங் சங்கச் செயலாளர் மெய்யப்பன் உள்ளிட்டோர் கலந்து கொண்டனர்.குறிப்பாக, கடலோரப் பகுதிகளில் வசிக்கும் இளைஞர்களிடையே துடுப்புப் படகு விளையாட்டுகள் குறித்த விழிப்புணர்வையும் ஆர்வத்தையும் ஏற்படுத்துவது அவசியமாகும். இதன் மூலம் திறமையான வீரர்களை அடையாளம் கண்டு, அவர்களுக்குத் தேவையான பயிற்சிகளை வழங்கி, தேசிய மற்றும் சர்வதேச அளவில் சாதனைகள் படைக்க ஊக்குவிக்க முடியும்.தமிழகத்தில் நீர் விளையாட்டுகளை ஊக்குவித்து, விளையாட்டு வீரர்களின் திறமைகளை மேம்படுத்தும் நோக்கில் தமிழ்நாடு விளையாட்டு மேம்பாட்டு ஆணையம் சார்பில் இப்போட்டிகள் நடத்தப்பட்டன.செய்தியாளர் அ.மகேஷ்